Под силно полициско обезбедување во Битола вечерва пристигна заменик претседателката Илијана Јотова. Таа е во дводневна посета на Северна Македонија. Активностите започнуваат вечерва со посета на проектот „Бугарски ловни традиции од времето на цар Самоил до денес“ во реконструираниот туристички објект ловечка куќа во ресенското село Евла.
Освен во ловечката куќа, планирано е Јотова да посети спомен-облежје во близина на селото останато од Втората светска војна.
Јотова во Битола доаѓа на 4 Ноември, Денот на ослободувањето на градот, но не е дел од официјалните гости, туку е со своја агенда. Утре ќе го посети Бугарскиот конзулат каде ќе биде поставена изложба, а потоа и воените гробишта во Цапари.
„Мојата посета е поврзана со Задушница. Од 1924 година во Бугарија тоа е ден во кој во Бугарија се сеќаваме на сите бугарски војници кои загинале, се молиме за нивните души и повикуваме никогаш повеќе да нема војни. Затоа заедно со бугарската делегација јас утре ќе отидам на првото признато од двете држави гробишта во село Цапари“, изјави вечерва Јотова.
Таа го коментираше и новиот закон со кој бугарските културни центри во Северна Македонија во рок од три месеци мора да ги променат своите имиња.
Одговорноста на тие кои ги донеле, се нивна одговорност. Тоа кое нас не интересира, ќе се провери низ времето како ќе се примени тој закон, како биде развиван, ние започнавме заедно еден процес, приклучувањето на Република Северна Македонија кон ЕУ, таму за каде јас секогаш сум тврдела дека е местото за вашата држава. Сметам дека многу од нашите проблеми, ако се уште има такви ќе бидат решени кога еден ден сите заедно ќе бидеме дел од големото европско семејство.