Дејли Телеграф известува за нов бран на егзекуции во Саудиска Арабија.
За 10 дена саудиските власти егзекутирале 12 лица за прекршоци поврзани со дрога, пишува британското издание, повикувајќи се на организацијата за човекови права „Reprieve“.
Се очекува Саудиска Арабија оваа година да постави „рекорд“ на егзекуции и покрај ветувањата на престолонаследникот Мохамед бин Салман дека ќе го намали бројот на егзекуции.
Сите погубени се мажи, меѓу кои тројца Пакистанци, четворица Сиријци, двајца Јорданци и тројца Саудијци.
Најмалку 132 лица се погубени во Саудиска Арабија досега оваа година, повеќе од бројот на егзекутирани минатата година и во 2020 година заедно.
Невладината организација „Reprieve“ (Reprieve) посочува дека неодамнешните егзекуции се показател за загрижувачки тренд кој е во спротивност со ветувањата на саудиските лидери за реформа на казнениот систем.
Во 2018 година, Мохамед бин Салман рече дека неговата влада се обидува да ја минимизира употребата на смртната казна и дека таа треба да се користи само против луѓе кои извршиле намерно убиство или предизвикале смрт од небрежност.
„Не замислувајте дека неговото височество кралот само се буди наутро и одлучи да издаде некои наредби. Тој ги усогласува своите постапки со законот, со Книгата“, изјави принцот Мохамед за магазинот „Тајм“.
Откако новинарот Џамал Кашоги беше убиен во октомври 2018 година, саудиските власти зборуваа за промена на законот за прекршоците поврзани со дрога да не се казнуваат со смрт.
Активистите велат дека по убиството на Кашоги има мораториум на егзекуциите за обвиненија поврзани со дрога.
Според Комисијата за човекови права на Саудиска Арабија, во 2020 година биле забележани најмалку егзекуции во последните децении.
Меѓутоа, на почетокот на оваа година, саудиските власти егзекутираа 81 лице осудени за различни дела, вклучително и злосторства поврзани со тероризам, убиства, вооружени грабежи и трговија со оружје.