Германската влада треба да размисли за олеснување на регулативите за задолжување за да ги обезбеди многу потребните јавни инвестиции, заклучи денеска Меѓународниот монетарен фонд (ММФ).
„Германската кочница за задолжување е поставена на релативно ниско ниво и годишната нето граница на задолжување би можела да се намали за околу еден процентен поен од БДП, со континуиран тренд на намалување на учеството на долгот во БДП“, наведува ММФ во извештајот за консултации според чл. IV.
Ова би отворило повеќе простор за „многу потребните“ јавни инвестиции, посочува меѓународниот кредитор. Уставниот суд во декември заклучи дека прераспределбата на парите од фондот за пандемијата е неуставна, а пресудата отвори „дупка“ од 60 милијарди евра во државниот буџет.
Растот треба да се забрза следната година
Промената на регулативата за задолжување би ја олеснила консолидацијата на буџетот, но неопходни се и реформи за да се намалат притисоците врз потрошувачката на среден рок и да се зголемат приходите, посочуваат од ММФ.
Германската економија годинава треба да порасне за само 0,2 отсто, прогнозираше ММФ во пролетниот извештај за светската економија, истакнувајќи, сепак, дека личната потрошувачка треба да закрепнува паралелно со слабеењето на инфлацијата. Во 2025 година растот би требало да се забрза до 1,3 отсто.
Забрзаниот раст во следната година постепено ќе ја зајакне довербата, што дополнително ќе ја поддржи потрошувачката, прогнозира ММФ, а дополнителен стимул ќе биде омекната монетарна политика. „Благодарение на тие фактори, растот на БДП ќе се забрза во текот на 2025/2026 година меѓу еден и 1,5 отсто“, пресметаа тие.
„Брановите на имиграција стивнуваат“
На среден рок, економскиот раст и јавните финансии ќе го притиснат, според ММФ, брзото стареење на населението. Генерацијата на бејби бум заминува во пензија, а брановите на имиграција стивнуваат, така што Германија ќе забележи најниска стапка на раст на работоспособното население во групата Г7, предупреди ММФ.
Неповолните демографски трендови ќе го забават економскиот раст на среден рок на само околу 0,7 проценти годишно, а изгледите би можеле да се подобрат со поголеми јавни инвестиции, вклучително зелена транзиција и дигитализација, сугерира ММФ.
За промена на регулативата за задолжување ќе биде потребно двотретинско мнозинство во горниот и долниот дом на германскиот парламент, забележува Ројтерс.