Московскиот суд во вторникот нареди Јулија Навални, вдовица на покојниот руски опозициски лидер Алексеј Навални, да биде уапсена во отсуство на два месеци.
Судот ја обвини Навални, која живее надвор од Русија, за учество во „екстремистичка“ група. Одлуката значи дека ќе се соочи со апсење доколку се врати во земјата.
Навални (47) се најде во центарот на вниманието по смртта на нејзиниот сопруг во казнената колонија на Арктикот во февруари оваа година и рече дека ќе продолжи да се бори за, како што Навални ја нарече „убавата Русија на иднината“.
Во вторникот, Навални на Икс им напиша на своите поддржувачи да не се фокусираат на судскиот налог против неа, туку на битката против рускиот претседател Владимир Путин.
„Кога пишувате за ова, ве молиме не заборавајте да го напишете најважното нешто: Владимир Путин е убиец и воен злосторник“, напиша таа.
„Неговото место е во затвор, а не некаде во Хаг, во удобна ќелија со телевизор, туку во Русија, во истата колонија и истата ќелија од два до три метри во која го уби Алексеј.
Кремљ негираше дека го наредил убиството на Навални.
Од смртта на нејзиниот сопруг, Навални се сретна со голем број западни лидери, вклучувајќи го и американскиот претседател Џо Бајден во Сан Франциско.
Непрофитната Фондација за човекови права со седиште во САД ја именуваше Навални за свој претседател, а таа рече дека ќе ја искористи својата нова улога за да инвестира повеќе во борбата на нејзиниот сопруг против Путин.
„Ќе искористиме сè што може да биде корисно во борбата против Путин, за да ја освоиме прекрасната Русија на иднината“, напиша таа на платформата X.