Во денешниот дневник на ТВ Сител, претседателот на Движењето ЗНАМ и градоначалник на Куманово, Максим Димитриевски вели дека „факт е дека во одреден момент не сме подготвени како држава суштински да се справиме со овие проблеми и затоа ни гори државата. Верувам дека оваа Влада ќе собере сила и ќе набави дополнителна опрема, зашто сигурноста и безбедноста на граѓаните треба да биде приоритет. Веќе разговарав со премиерот на оваа тема и верувам дека во следниот период ќе излезат со решенија“.
Како што истакна Димитриевски во дневникот на ТВ Сител, „срамота е веќе да се бара помош со хеликоптери и друг тип возила од страна, а да не издвоиме сопствени средства за ваква намена“.
Исто така тој изрази сочувство до семејството на жртвата од пожарот и рече дека дошло до гушење на лицето кое се обидувало да ја спаси земјоделската механизација.
Вчера, рече Димитриевски, во Куманово имало 11 пожари кои биле покриени со 45 пожарникари, а денес имало седум пожари и сите биле „решени“.
-Според стандардите, треба да имаме околу 100 луѓе, но, за жал, немаме доволно средства. Да не беа денес тие три „ер трактори“ и дополнително еден хеликоптер, тешко дека ќе локализиравме пожар на 300 хектари површина. Потребни се системски решенија, системски промени, напомена градоначалникот и лидер на ЗНАМ.