Од понеделник граѓаните ќе можат од аптеките бесплатно да земаат лекови кои сега се ставени на позитивната листа. Ова е прво ажурирање на листата по десет години. На неа се додадени лекови за висок крвен притисок, за срцеви заболувања, анти-агреганси, лекови за третман на депресија и за деменција.
Според министерот за здравство, Арбен Таравари значително ќе се намали процентот на пациенти кои приватно плаќаат за лекови. Тој гарантира дека на секои три до четири месеци ќе има надополнување на листата со еден до три нови лека.
„Ова е револуција на проблеми што не се решени повеќе од десет години. Последната позитивна листа е од 2009 година, а во 2014 година само еден лек е надополнет, а сега имаме девет лека за 50 дена. Се надевам дека веднаш после Нова година ќе имаме повторно проширување на листата“, изјави Арбен Таравари, министер за здравство.