Комисијата за спречување и заштита од дискриминација апелира до Собранието да организира јавни расправи во рамки на законодавната постапка за донесување на повеќе закони од областа на образованието. Станува збор за Предлог-законот за средно образование, измените и дополнувањата на Законот за основно образование, Предлог-законот за учебници и други регулативи кои се во процес на изработка.
Од Комисијата истакнуваат дека имаат голем интерес за учество во процесот на изменување и дополнување на овие закони, бидејќи образованието се смета за клучна област за промовирање на еднаквоста од најмала возраст. Притоа, се нагласува потребата учениците да бидат заштитени од дискриминација и пристрасно насилство, како и да ги усвојат демократските вредности согласно уставниот поредок на земјата.
„Основната причина за измените на Законот за основно образование е прашањето на еднаквост и недискриминација, особено во контекст на спроведувањето на пресудата на Европскиот суд за човекови права во случајот Елмазова и други против Северна Македонија“, соопшти Комисијата.
Комисијата, како тело со законска надлежност за давање коментари и мислења од аспект на еднаквост и недискриминација, смета дека инклузивниот пристап во донесувањето на законите е од суштинско значење. Тие апелираат регулативите да се усвојуваат на транспарентен начин, со доволно време за поднесување предлози и организирање јавни расправи.
„Во демократско општество, учеството на сите засегнати чинители е клучно за креирање поквалитетен и поинклузивен образовен систем, кој ќе одговара на потребите на сите ученици“, се наведува во повикот.
Со овој апел, Комисијата го нагласува значењето на транспарентноста и јавната дебата како основа за унапредување на образованието во државата.