Молдавската претседателка Маја Санду денеска ја прогласи корупцијата и незаконското финансирање од Русија за најголема закана за парламентарните избори кои ќе се одржат на 28 септември во оваа источноевропска земја.
Проевропската Партија за акција и солидарност на претседателката би можела да ја изгуби мнозинската поддршка во парламентот на поранешната советска република, која се наоѓа помеѓу Украина и Романија.
„Руската Федерација од есен сака да ја контролира Република Молдавија и подготвува невидено влијание врз изборите во септември“, изјави Санду на прес-конференција во Кишињев.
Кремљ ги отфрли тврдењата дека Русија се меша во изборниот процес во оваа држава со два и пол милиони жители. Четири проруски партии најавија формирање на блок со цел победа на изборите и симнување на владата која има за цел влез во ЕУ до 2030 година. Односите меѓу Русија и Молдавија се влошија откако Кишињев ги интензивираше напорите за европска интеграција.
Санду ја спомена и употребата на криптовалути
„Најголемата опасност од руското влијание врз нашите внатрешни прашања е тоа што претставува директна закана за националната безбедност, суверенитетот и европската иднина на нашата земја“, рече Санду.
Молдавија ја обвинува Русија дека и минатата година се вмешала во претседателските избори и референдумот за приклучување кон ЕУ. Тогаш, молдавските граѓани со само 10.000 гласови повеќе одлучија да продолжат кон евроинтеграција (50,35% наспроти 49,65%).
Кишињев тврди дека Русија ќе делува преку поткуп на гласачи, сајбер напади, платени протести и ширење дезинформации.
„Само преку криптовалути се планира финансирање во вредност од околу 100 милиони евра“, изјави Санду, без да приложи докази за тоа тврдење.