Шпанскиот регион Каталонија е завиен во црно по синоќешниот страшен пожар во кој животот го загубија петмина млади луѓе на возраст од 14 до 18 години. Трагедијата се случила во магацински простор на петкатна станбена зграда во градот Манљеу, лоциран на околу 80 километри северно од Барселона.
Заглавени во поткровјето
Според информациите од итните служби, пожарот избувнал доцна во ноќта во просторија на последниот кат од зградата. Овој простор младите често го користеле како место за дружење и собири. За жал, жртвите не успеале навреме да го напуштат објектот кога пламените јазици го зафатиле поткровјето.
Покрај петте жртви, уште четири лица се здобиле со полесни повреди и им е укажана медицинска помош.
Шок и болка во мароканската заедница
Делот од градот каде што се случила несреќата е претежно населен со луѓе со мароканско потекло, кои се длабоко потресени од загубата на своите млади сограѓани.
„Сите ги познававме… Тоа беа деца“, изјавил низ солзи жител на зградата за националниот сервис РТВЕ.
Евакуација и привремено сместување
Поради силината на пожарот, целата зграда била итно евакуирана. Поголемиот дел од семејствата денеска наутро се вратиле во своите домови, но три семејства чии станови се оштетени се привремено згрижени во хотел.
Претседателот на владата на Каталонија, Салвадор Иља, изрази длабоко сочувство до семејствата на настраданите, нагласувајќи дека е шокиран од трагедијата. Истражните органи сè уште работат на утврдување на причината за избувнување на пожарот.