Владата на Косово денеска официјално одобри испраќање на припадници на своите вооружени сили во Појасот Газа. Овој потег е дел од пошироката американска иницијатива за формирање Меѓународни сили за стабилизација (ИСФ), по минатогодишното примирје меѓу Израел и Хамас.
Косово се приклучува на групата земји, меѓу кои се и Албанија, Мароко, Индонезија и Казахстан, кои ветија воена поддршка за одржување на мирот и помош за преодната администрација во Газа. Целиот процес се одвива под покровителство на „Одборот за мир“ на американскиот претседател Доналд Трамп.
На владината седница, која беше јавно пренесувана, премиерот Аљбин Курти истакна дека одлуката е донесена по официјалната покана од САД добиена во декември минатата година.
„Подготвени сме да учествуваме и да им помогнеме на луѓето од Газа, бидејќи ние самите бевме, а и сè уште сме, корисници на помошта од меѓународните сили уште од 1999 година“, изјави Курти.
Иако одлуката е донесена, Владата во Приштина засега не открива колкав ќе биде бројот на војници кои ќе бидат распоредени во оваа мировна мисија.