Американски државјанин заразен со вирусот ебола, кој се инфицирал додека престојувал во Демократска Република Конго, моментално се лекува во Германија и е во стабилна здравствена состојба, соопштија од Центри за контрола и превенција на болести. Според податоците, епидемијата во Конго досега однела повеќе од 130 животи.
Координаторот за ебола во CDC, Сатиш Пилаи, изјави дека уште шест американски државјани кои биле изложени на висок ризик ќе бидат префрлени од Конго во Германија и Чешка.
Пациентот што се лекува во Германија е идентификуван како Питер Стафорд, медицински мисионер кој се заразил додека лекувал пациенти заболени од ебола.
Во меѓувреме, Вашингтон пост, повикувајќи се на извори запознаени со ситуацијата, објави дека Белата куќа одбила да му дозволи на Стафорд да се врати во САД.
Од друга страна, на сопругата и децата на друг мисионер од истата група им било дозволено да се вратат во САД, откако експертите на CDC извршиле две медицински проценки на семејството.
Пилаи не одговорил директно на прашањето дали САД им забрануваат влез на државјани кои се заразени или биле изложени на вирусот ебола.
Тој посочи дека CDC испратил свој персонал во Демократска Република Конго и во соседна Уганда, но нагласил дека тимовите не се распоредуваат директно во жариштето на епидемијата поради нестабилната безбедносна состојба.
Според него, во моментов нема официјално одобрени медицински третмани за овој сој на ебола, но се водат активни разговори за испраќање производи со моноклонални антитела.