Снимка од американскиот министер за здравство Роберт Ф. Кенеди помладиот како фаќа две змии со голи раце стана вирално, но службениците за диви животни ја предупредуваат јавноста да не се пробува подвигот дома.
Во описот на видеото, објавено денес, Кенеди рече дека ги отстранува влекачите од терасата на куќата на неговиот колега д-р Мехмет Оз во Флорида, објави Би-Би-Си.
„Шерил навива додека отстранувам пар црни змии од терасата на д-р Оз“, напиша Кенеди, очигледно мислејќи на неговата сопруга, актерката Шерил Хајнс. Во видеото може да се слушне женски глас, веројатно нејзин, како прашува: „Зошто?“
Видеото го прикажува Кенеди, облечен во кошула, панталони и чорапи, но без чевли, како се приближува до змиите, се наведнува и ги фаќа. Додека се насмевнува на камерата, држејќи ги змиите што изгледа го касаат, женски глас вели: „Боби, те молам“. Неговиот домаќин, д-р Оз, е директор на Центрите за услуги за Медикер и Медикејд, што е дел од здравствениот оддел што го води Кенеди.
Змијата за која станува збор е вид змија позната како „црн тркач“, која, според Националната служба за паркови, е „неотровна и безопасна за луѓето сè додека не се ракува со неа“.
Комисијата за заштита на рибите и дивите животни на Флорида неодамна ги предупреди жителите да се држат подалеку од змиите, бидејќи тие стануваат поактивни напролет. „Дајте им многу простор на змиите и восхитувајте им се од далечина“, соопшти агенцијата во објава на Фејсбук. „Одолејте на желбата да земете една – дури и нашите неотровни змии можат лошо да каснат“, додаде таа.
Ова не е прв пат Кенеди да има блиски средби со диви животни.