Повеќе од половина од возрасните Германци имаат прекумерна телесна тежина, а дел од нив се соочуваат и со дебелина, покажуваат официјалните податоци објавени денеска. Особено погодени се мажите.
Околу 53 отсто од возрасните лица на возраст од 18 години и повеќе, опфатени со истражувањето во 2025 година, имале индекс на телесна маса (БМИ) поголем од 25, соопшти Сојузниот завод за статистика. Според Светската здравствена организација, за лица со прекумерна тежина се сметаат возрасните чиј БМИ е еднаков или поголем од 25.
Просечен маж тежи 86,5 килограми, жена 69,7 килограми
Вкупно 17,9 отсто од испитаниците биле класифицирани како дебели, што значи дека нивниот БМИ е еднаков или поголем од 30.
Податоците покажуваат дека мажите почесто имаат прекумерна тежина отколку жените. Вкупно 62,6 отсто од мажите имале БМИ поголем од 25, во споредба со 43,8 отсто од жените. Околу 20 отсто од мажите се сметаат за дебели, наспроти 15,8 отсто од жените.
Просечната телесна тежина на Германците бележи благ пораст во последните години и сега изнесува 78,3 килограми, во споредба со 77,7 килограми во 2021 година и 77 килограми во 2017 година.
Просечниот маж во Германија тежи 86,5 килограми, додека просечната жена тежи 69,7 килограми.