Со длабока почит кон починатиот органодарител и искрена благодарност до неговото семејство, медицинските тимови вклучени во процесот на трансплантација оддадоа признание за една од најхуманите одлуки што може да се донесе во моменти на најголема болка и загуба.
Од Министерството за здравство информираат дека благодарение на хуманоста на семејството на дарителот и посветеноста на здравствените работници, повторно е овозможена шанса за нов живот и надеж за пациентите кои чекаат трансплантација.
„Во овие моменти, хуманоста на едно семејство и посветеноста на здравствените работници отвораат можности за нова надеж и нов живот“, изјави проф. д-р Билјана Кузмановска, национален координатор за трансплантација.
Министерот за здравство Азир Алиу упати благодарност до семејството на дарителот и признание до сите медицински тимови кои учествувале во сложениот процес.
„Министерството за здравство изразува најдлабока благодарност до семејството на дарителот и признание до сите медицински тимови вклучени во овој сложен и благороден процес“, истакна министерот Алиу.
Од Министерството потенцираат дека органодарителството претставува највисок чин на човечност и солидарност, кој овозможува спасување и подобрување на животите на многу пациенти. Воедно, институцијата продолжува да ја промовира свеста за значењето на донирањето органи и важноста на трансплантациската медицина во земјата.
Органодарителството останува симбол на надежта, хуманоста и несебичната поддршка кон оние на кои им е најпотребна.