Мрежата за заштита од дискриминација изрази сериозна загриженост поради предлогот Исмаил Синани да биде избран за член на Комисијата за спречување и заштита од дискриминација (КСЗД). Организацијата смета дека неговите јавно изнесени ставови и досегашното професионално искуство отвораат прашања за неговата соодветност за функцијата.
Реакцијата следува откако собраниската Комисија за прашања на изборите и именувањата го предложи Синани за член на КСЗД.
Главни забелешки од Мрежата
- Во повеќе јавно достапни текстови, објавени во периодот кога Синани работел како новинар и уредник во медиуми на албански јазик, се изнесени ставови кои содржат негативни квалификации за ЛГБТ-заедницата, феминизмот и родовата еднаквост.
- Овие ставови, според Мрежата, предизвикуваат сомнеж за неговото разбирање на човековите права, еднаквоста и недискриминацијата – принципи врз кои функционира Комисијата.
- Се тврди дека Синани не го исполнува законскиот услов за минимум седум години работно искуство во областа на човековите права, од кои најмалку пет години во областите еднаквост и недискриминација. Во неговата биографија се наведуваат медиумски активности, соработка со граѓански организации и учества на настани поврзани со родови прашања, но без конкретни примери за професионална работа на заштита од дискриминација.
Мрежата бара појаснувања за критериумите според кои е спроведена селекцијата на кандидатите и за начинот на кој е утврдено дека предложениот кандидат е најсоодветен за функцијата.
Организацијата го поздрави зголеменото ниво на транспарентност откако Собранието ги објави листите на пријавени кандидати и оние кои ги исполниле формалните услови. Сепак, сметаат дека и понатаму недостигаат доволно информации за процесот на оценување и избор.
Ова е трет обид во последните неколку месеци за избор на член на КСЗД, процес што претходно беше проследен со критики и јавни дебати. Исмаил Синани досега јавно не се има огласено по повод реакцијата на Мрежата за заштита од дискриминација.