Тажна вест ја потресе јавноста откако преку социјалните мрежи беше соопштено дека починала Ирена, водителката на некогашната популарна емисија „Версус“.
Веста предизвика бројни реакции и емотивни објави од нејзини колеги, пријатели и соработници, кои се простуваат од неа со пофални зборови за нејзиниот професионализам, енергија и личност.
Се огласи и Игор Филевски, нејзиниот ко-водител од емисијата, кој се присети на заедничките почетоци и значењето што Ирена го имала за целиот проект.
„Штотуку ја дознав веста која првично не сакав да е точна… Ирена, драга моја Иренке Версус, нека ти е широко небото и вечен мирот каде и да си сега“, напиша Филевски, додавајќи дека без неа емисијата „Версус“ немало ни да започне.
Тој нагласи дека Ирена била клучна за успехот на проектот, со својата енергија, интелект и ведар дух, кој ја правел емисијата препознатлива на македонската медиумска сцена.
Од неа се прости и креативниот тим на New Moment, кои ја опишаа како „нескршлив дух“, личност што знаела да донесе насмевка, но и да воспостави искрен човечки дијалог.
„Ќе ни недостасуваш. Многу“, стои во нивната порака, со изразено сочувство до семејството, пријателите и сите што ја познавале.
Со бројни емотивни пораки, јавноста и колегите продолжуваат да се простуваат од Ирена, која остави силен белег во македонските медиуми.