Голем пожар денеска го зафати теренот помеѓу штипските села Долани и Љуботен. Екипите на Територијалната противпожарна единица (ТППЕ) – Штип се на терен и вложуваат максимални напори за локализирање на огнената стихија, која во моментов се шири кон селото Љуботен.
Огнот ставен под контрола кон Долани
Пожарот бил пријавен попладнево на телефонскиот број 112, по што веднаш биле испратени две екипи на штипските пожарникари. Благодарение на брзата реакција и помошта од локалното население, кое со трактори изорало заштитни појаси, огнот од страната кон селото Долани е ставен под контрола и изгаснат, со што е спречена опасноста од негово ширење кон куќите.
Критична состојба кон Љуботен
Иако ситуацијата во Долани е смирена, пожарот во моментов се шири во правец кон селото Љуботен. Горат сува трева, нискостеблеста вегетација и борова шума, што го отежнува гаснењето поради непристапниот терен и ветерот
Во гаснењето на пожарот е вклучена целата расположлива логистика:
- Противпожарни единици: Едно противпожарно возило, три противпожарни џипови и 10 пожарникари.
- Локална поддршка: Ангажирана е работна машина (скип) од ЈП „Стипион“ – Штип и четири трактори од локалното население.
- Останати екипи: На терен се присутни и припадници на полицијата и екипи на Итната медицинска помош.
Едно лице со изгореници
При гаснењето на пожарот, едно лице се здобило со минимални изгореници. Екипите на Итната медицинска помош веднаш реагирале и му укажале соодветна лекарска помош. Според последните информации од теренот, нема други повредени лица, а надлежните служби остануваат целосно мобилизирани до целосно изгаснување на огнот.