Книжевниот центар „Антолог“ соопшти дека претрпел огромни и речиси целосно неповратни штети по вчерашното силно невреме што го зафати Скопје и подрачјето на Кисела Вода, при што биле поплавени нивните магацински простории.
Од таму велат дека објектот и целиот инвентар се сериозно уништени, при што, како што наведуваат, се изгубени десетици илјади книги, возило, техника и речиси целата опрема со која функционирале.
„‘Антолог’ каков што го познавате и го сакавте – повеќе не постои“, стои во нивното соопштение, во кое се додава дека штетата е и материјална и емотивна, поради 27-годишната работа и вложување на генерации вработени и соработници.
Од издавачката куќа велат дека проблемите биле предизвикани од силното невреме и несоодветната или непостоечка канализациска инфраструктура, што довело до брзо и целосно поплавување на просториите.
Во потресното обраќање се наведува дека со часови се чекала помош додека водената стихија го уништувала нивниот труд, при што, како што велат, е изгубено минатото, сегашноста и иднината на издавачката куќа.
„Срцето ни е скршено, се чувствуваме целосно поразени“, стои во реакцијата на „Антолог“.
Оттаму изразија благодарност до Министерството за внатрешни работи и до сите граѓани кои се обиделе да помогнат на терен, посочувајќи дека биле сведоци на сцени што, како што велат, никој не би сакал да ги доживее.
„Господ напомош!“, завршува соопштението.