Во тек се интензивни дипломатски напори за смирување на тензиите во судирот меѓу САД и Иран, објави Си-Ен-Ен во петок, повикувајќи се на американски претставник.
Според истиот извор, Вашингтон намерно ги менувал воените удари со паузи за да се избегне натамошна ескалација и да се отвори простор за напредок на дипломатијата, при што одржува список на можни цели како средство за притисок.
На телевизијата дополнително беше наведено, повикувајќи се на повеќе официјални лица, дека САД се подготвени за можни удари вечерва доколку биде потребно, но дека во овој момент предност имаат дипломатските напори.
Во меѓувреме, иранските државни медиуми соопштија дека неколку напади во четврток навечер биле насочени кон воени објекти во два града, додека израелски претставници изјавија дека засега не се запознаени со какво било израелско учество во нападите на територија на Иран.
Американскиот претставник додаде дека техничките разговори меѓу Вашингтон и Техеран за иранската нуклеарна програма и понатаму траат како дел од обидите за дипломатско решение. Истовремено беше нагласено дека состојбата останува променлива и дека воените удари би можеле да продолжат доколку тоа го наметнат околностите.