Во германскиот град Келкхајм, во сојузната покраина Хесен, се случило тешко кривично дело кое ја потресе локалната заедница. Шеесетгодишен хрватски државјанин е осомничен дека на улица ја усмртил својата 58-годишна сопруга, исто така хрватска државјанка.
По нападот, мажот бил задржан од сведоци кои се нашле на местото на настанот, а потоа бил уапсен. Како што пишува германскиот портал „Focus.de“, осомничениот треба да биде изведен пред истражен судија, кој ќе одлучи за евентуално определување притвор.
Државното обвинителство во Франкфурт за „FOCUS online“ потврдило дека станува збор за хрватски државјани кои биле во брак од 1991 година.
„Од оваа рана фаза на истрагата не можеме да дадеме дополнителни информации“, соопштиле од обвинителството.
Според досегашните информации од полицијата и обвинителството, мажот ја нападнал сопругата во вечерните часови на отворен простор, во близина на пазар во Келкхајм. Според првичните сознанија, на трагичниот настан му претходела расправија.
Нападот се случил пред бројни минувачи, а неколкумина од нив успеале да го совладаат осомничениот и да го задржат до пристигнувањето на полицијата. При интервенцијата, мажот се здобил со полесни повреди.
Мотивот и околностите кои довеле до трагедијата засега не се познати. Истрагата е во тек. Полицијата официјално соопштила само дека станува збор за напад со „ладно оружје“, но не потврдила дека било употребено мачете, иако некои сведоци го тврдат тоа.
Нападнатата жена починала на местото на настанот, во близина на Франкфуртската улица.
Сведок опишал страшни сцени
Еден од очевидците, кој се претставил само како Петар, изјавил дека во моментот на нападот се наоѓал на само неколку метри од местото на настанот.
Според неговите зборови, маж кој можеби бил под дејство на алкохол ја нападнал жената и ѝ задал удар со мачета во пределот на вратот.
„Сè беше полно со крв. Бегав спасувајќи си го животот“, раскажал сведокот.
Тој додал дека видел како жената се обидела да избега во ист правец, но набрзо паднала. Рекол дека видел само еден удар, по што нападот завршил.
Познаник на семејството: Жената изгледаше исцрпено и под голем стрес
За случајот зборувал и Владимир Миловац од Келкхајм, познаник на брачниот пар. Тој рекол дека долго време го познавал осомничениот, додека жртвата ја познавал во последните неколку месеци.
Според неговите зборови, жената му делувала многу исцрпено и под голем стрес, додека мажот понекогаш бил агресивен и ѝ се заканувал.
„Кога утрово слушнав дека починала, бев многу тажен“, рекол Миловац, додавајќи дека жали што порано не се вмешал.
Последиците од злосторството се почувствувале низ целиот град. Жителка на Келкхајм на местото на трагедијата оставила бела роза.
„Утрово прочитав што се случило и тоа целосно ме погоди. Секогаш тука појадуваме“, рекла таа, покажувајќи кон блиската пекара.
„Ставав роза затоа што не знаев што друго да направам. Страшно е кога нешто вакво ќе се случи во вашиот град. За жал, тоа се случува премногу често. Немам зборови“, додала жената.
Полицијата им помогнала на потресените сведоци
Портпаролот на полицијата изјавил дека местото во моментот на нападот било многу фреквентно, бидејќи во близина има повеќе угостителски објекти.
„Таму има различни угостителски објекти, па имаше и многу луѓе“, рекол тој.
Поради тежината на настанот, на местото биле повикани и духовници за да им помогнат на сведоците кои го виделе нападот.
„Сведочењето на ваков настан претставува голем психички товар“, додал полицискиот портпарол.
Местото на злосторството било обезбедувано од голем број полицајци. Форензичарите во заштитни одела детално го прегледувале теренот, додека пожарникарите доцна навечер поставиле осветлување за да продолжи увидот.
По трагедијата се отвори и прашањето дали случајот може да биде оквалификуван како фемицид. Полицијата и обвинителството засега не се изјасниле за оваа можност.
Терминот фемицид се користи за убиства на жени извршени поради фактот дека се жени, а најчест облик се убиствата извршени од сегашни или поранешни партнери.
Меѓу можните мотиви кај родово заснованите убиства се наведуваат посесивност, презир, сексуална фрустрација, омраза кон жените и потреба за контрола и доминација.
Германскиот весник „Билд“, повикувајќи се на свои извори, објавил дека сопружниците и претходно често се расправале и дека наводно жената повеќепати контактирала со полицијата.
Една познаничка на брачниот пар изјавила за весникот дека мажот бил агресивен и дека луѓето од нивната околина се плашеле ситуацијата да не заврши со сериозен инцидент.
Полицијата и обвинителството засега не ги потврдиле овие наводи, а сите околности околу трагедијата ќе бидат утврдени со понатамошната истрага.