Русија во текот на ноќта изведе еден од најсмртоносните напади врз Киев и неговата околина оваа година. Во нападот со балистички проектили и дронови загинаа најмалку 21 лице, а десетици се повредени.
Украинските власти објавија дека едно лице загинало во самиот Киев, додека уште 16 луѓе страдале во поширокиот регион на главниот град. Најмалку 44 лица се повредени, а спасувачките екипи ги пребаруваат урнатините поради страв дека под нив има уште заглавени луѓе.
Руските напади погодија станбени згради, железничка станица, магацини и други цивилни објекти. Големи пожари избувнаа на пет локации, зафаќајќи вкупна површина од околу 230.000 квадратни метри.
Украина не успеа да пресретне ниту еден балистички проект и алармира за недостиг од систем „Патриот“
Украинското воено воздухопловство соопшти дека Русија за време на нападот лансирала 24 балистички и четири противбродски проектили, како и 115 дронови.
Украинската противвоздушна одбрана соборила 98 дронови, но не успеала да пресретне ниту еден балистички проект. Поради ова, Киев повторно упати апел до западните сојузници за итна испорака на дополнителни ракети за американските системи „Патриот“, кои единствено имаат можност за соборување ваков тип проектили.
Украинскиот претседател Володимир Зеленски порача дека противбалистичките системи можеле да спасат човечки животи.
„Доцнењето на партнерите во испораката на противбалистички системи доведува до страшни жртви и разурнувања“, истакна Зеленски, додавајќи дека сојузниците оваа година значително ги намалиле испораките на ракети за ПВО.
Русија тврди дека гаѓала воени логистички центри
Руското Министерство за одбрана соопшти дека цел на нападот биле логистички и снабдувачки центри во Киев и околината.
„Тие центри служеа за складирање и испорака на различни видови оружје и воена опрема, како и за производство и дистрибуција на дронови“, се наведува во соопштението од Москва.
Покрај ова, руските власти тврдат дека во близина на црноморското пристаниште Одеса погодиле три товарни брода кои наводно превезувале воена опрема, но овие тврдења засега не се независно потврдени.
Напади и во други региони
Во изминатите 24 часа руски напади се регистрирани и во Запорошката, Доњецката и Харковската област. Русија последниве недели ги интензивираше нападите врз Киев, додека Украина истовремено ги зачести ударите врз руската енергетска и логистичка инфраструктура.
Гувернерот на руската Тулска област, Дмитриј Миљаев, објави дека украински дрон во текот на ноќта паднал врз магацин на интернет-трговецот Wildberries, предизвикувајќи пожар во кој е повредено едно лице.
Истовремено, украинските власти го осудија видео-снимката на која се гледа како дрон прогонува маж во Херсон, нарекувајќи го настанот намерна хајка врз цивили. И двете страни продолжуваат да ги отфрлаат обвинувањата за свесно таргетирање на цивилното население.