Иран и Оман се договорија за географскиот правец по кој бродовите би требало да минуваат низ стратешки важниот Ормуски Проток, соопшти иранското Министерство за надворешни работи.
Додека Техеран тврди дека САД не учествувале во овој договор, американскиот претседател Доналд Трамп изјави дека преговорите „напредуваат исклучително добро“ и најави можен споразум во следните неколку денови.
Портпаролот на иранското МНР, Есмаил Багаеи, соопшти дека двете земји подготвуваат заедничка декларација која ќе ги опфати техничките, правните, безбедносните и еколошките прашања.
„Под услов одредени трети страни да не го попречуваат процесот, се разгледува и финализира заедничка изјава на двете земји во која ќе бидат изнесени главните точки и договори“, изјави Багаеи, притоа алудирајќи на САД.
Иран бара наплата за премин, Вашингтон инсистира на слободна пловидба
Главниот камен на сопнување останува барањето на Иран за наплата на такси за премин низ протокот. Техеран тврди дека има суверено право над дел од тој воден пат, додека САД и заливските земји инсистираат на апсолутна слобода на пловидбата во согласност со меѓународното право.
Оман претходно му предложи на Иран план, поддржан од заливските држави, според кој Техеран би можел да наплаќа доброволни надоместоци за поморски и безбедносни услуги. Сепак, Багаеи предупреди дека договорот меѓу Иран и Оман сам по себе не може да гарантира безбедна пловидба додека трае американската поморска блокада.
„Повторното отворање на Ормускиот Проток зависи од промената на американското однесување и коригирањето на нивните прекршувања“, објави иранската државна телевизија.
Трамп: „Протокот набрзо ќе се отвори или Иран ќе претрпи жестоки удари“
Американскиот претседател Доналд Трамп во разговор за Fox News изјави дека САД се активно вклучени во преговорите и упати директно предупредување до Техеран.
„Протокот многу брзо ќе се отвори или тие ќе бидат погодени исклучително тешко, па потоа протокот повторно ќе се отвори“, порача Трамп.
Според информациите, во моментов се преговара за привремен договор со кој Иран и Оман би го координирале поморскиот сообраќај преку таканаречен „среден коридор“, но остануваат отворени клучните прашања за финансиските надоместоци и американскиот барање за целосно слободен премин.
Ормускиот Проток, низ кој пред конфликтот минуваше речиси една петтина од светската трговија со нафта и течен природен гас (ЛНГ), веќе со месеци е речиси целосно блокиран за комерцијална пловидба.