Македонија денес слави 35 години самостојна и независна држава, но и по три и пол децении по референдумот за независност, дел од најважните моменти од тие историски денови сè уште можат да се прочитаат онака како што биле забележани во моментот – на страниците на старите весници.
Редакцијата на 4NEWS ја посети Градската библиотека „Браќа Миладиновци“ – Скопје каде се чуваат примероци од периодиката од 1991 година, преку кои може да се следи патот од декларацијата за сувереност, повикот за референдум, гласањето, па сè до прославата и објавувањето на резултатите.
Директорката Анета Механџиска вели дека овие весници денес не се само новинарски извештаи, туку автентични сведоштва за времето.
Тие ја доловуваат атмосферата во која живееле граѓаните – неизвесноста, исчекувањето, надежта, но и радоста по историскиот исход.
„Не чуваме само хартија, чуваме сведоштва за тоа кои сме биле“, е пораката од библиотеката.
Денес, старите весници се своевидна временска капсула – начин да се види не само што се случило, туку и како луѓето го доживеале тоа додека историјата се создаваше.
По повод големиот јубилеј – 35 години од македонската независност, 4TV подготвува специјално празнично издание. Гледајте го отвореното студио денеска, со почеток во 19:00 часот во живо.