Паника избила во утринските часови пред стручно и техничко училиште во турскиот град Тургутлу, откако вооружен маж отворил оган од пушка во близина на училишниот комплекс. Во нападот се повредени најмалку четири лица, од кои повеќето се средношколци, соопштија локалните власти.
Инцидентот се случил во момент кога учениците пристигнувале во училишниот двор за почеток на наставата. По пријавувањето на пукањето, на местото веднаш биле упатени полициски екипи и амбулантни возила.
Повредените биле згрижени и префрлени во најблиските здравствени установи, додека полицијата го обезбедила просторот околу училиштето.
Канцеларијата на гувернерот на Маниса го потврди инцидентот, наведувајќи дека безбедносните служби брзо воспоставиле контрола на теренот.
Според првичните информации објавени во турските медиуми, напаѓачот дејствувал сам и пукал кон група млади лица кои пристигнувале пред училишната зграда. Полицијата врши увид и собира докази, вклучително и чаури, за да се утврдат сите околности на нападот.
Мотивот за пукањето засега не е познат. Турските власти најавија детална истрага, а околу училиштата во провинцијата Маниса е засилено полициското присуство.