Речиси 38 отсто од анализираниот период системот „Мој Термин“ немал обезбедено континуирано одржување, покажува ревизијата на Државниот завод за ревизија. Во периодот од јануари 2021 до април 2026 година, системот бил без договор за одржување вкупно 738 дена.
За одржување на „Мој Термин“ и поврзаните информациски системи во јавните здравствени установи биле склучени договори во вредност од 333,3 милиони денари, односно околу 5,42 милиони евра. Од оваа сума, само 9 отсто се однесуваат на националниот здравствен информатички систем, додека 91 отсто на други системи во јавното здравство.
Ревизорите утврдиле и кадровски проблеми – Управата за електронско здравство има пополнето само 29 отсто од предвидените работни места. Констатирани се и слабости во ИТ-безбедноста, заштитата на медицинските и личните податоци, како и во обезбедувањето континуитет на системите.
Во ГОБ „8 Септември“, анализата покажала дека во периодот од јануари до април 2026 година СМС потсетувања за закажан термин биле испратени за само 10,1 отсто од реализираните упати. Ревизијата утврдила и дека во системот не се евидентираат хируршки интервенции од оваа болница, што влијае врз точноста на податоците за листите на чекање.
Дополнително, Министерството за здравство во 2024, 2025 и 2026 година немало годишни планови за контроли во јавните здравствени установи, ниту биле спроведени такви контроли.
ДЗР утврдил и дека називот „Мој Термин“ во 2024 година бил регистриран од економскиот оператор кој го одржува системот, што отвора прашања поврзани со правната заштита и интелектуалната сопственост.
Ревизорите препорачуваат мерки за обезбедување континуирано одржување, подобрување на ИТ-инфраструктурата, зајакнување на заштитата на податоците и воспоставување поефикасни контролни механизми.