Собранието треба да одлучува за продолжување на кризната состојба поврзана со снабдувањето со нафта и нафтени деривати, која според предложените измени би останала во сила до 20 април 2027 година. Предлог-одлуката денеска помина на собраниската Комисија за одбрана и безбедност и е упатена на натамошна постапка.
Министерот за одбрана Владо Мисајловски, образложувајќи го предлогот пред членовите на Комисијата, посочи дека измената се однесува на продолжување на рокот за постоење на кризната состојба за дополнителни шест месеци.
„Фактички, со оваа одлука, зборовите ‘до 20 октомври 2026’ се заменуваат со зборовите ‘до 20 април 2027 година’“, појасни Мисајловски.
Продолжувањето се предлага поради можноста од нарушување на снабдувањето со нафта и нафтени деривати на територијата на Македонија.
Предлог-одлуката треба да биде разгледана во натамошната собраниска постапка, по што ќе се знае дали кризната состојба ќе продолжи да важи до април следната година.