Поранешниот претседател на Советот на јавните обвинители, Антонио Јолевски, е назначен за вршител на должноста виш јавен обвинител во Вишото јавно обвинителство Битола. Тој доаѓа на местото на Пецо Везировски, кој е под истрага за примање награда за противзаконито влијание.
Одлуката е донесена на 53. седница на Советот на јавните обвинители, одржана на 13 октомври, откако Основниот кривичен суд Скопје го известил Советот дека на Везировски му е изречена мерка претпазливост – забрана за извршување на работните активности поврзани со кривичното дело, односно забрана за пристап до неговото работно место.
По добиеното известување, Советот ја стави надвор од сила претходната одлука за именување на Везировски и на негово место го постави Јолевски, кој досега работеше како обвинител во истото обвинителство.
Истрага за противзаконито влијание
Основното јавно обвинителство за гонење организиран криминал и корупција (ОЈО ГОКК) на 7 октомври поведе постапка против Везировски поради сомнение за кривично дело „примање награда за противзаконито влијание“ (член 359, став 3 во врска со став 2 од Кривичниот законик).
Според информациите од ОЈО ГОКК, со примена на посебни истражни мерки се обезбедени докази кои укажуваат дека тој ја искористил својата функција и реално влијание за да ургира кај колеги обвинители и судии во најмалку четири предмети. На тој начин тој обезбедувал поповолни позиции или пониски казни за осомничени и обвинети лица.
Определени мерки за претпазливост
Судија на претходна постапка при Основниот кривичен суд Скопје целосно го прифати предлогот на обвинителството и му одреди следниве мерки за претпазливост:
- Одземање на патната исправа (пасошот)
- Забрана за преземање определени работни активности
Од Кривичниот суд појаснуваат дека, согласно законот, судот не може да одреди построга мерка од онаа што ја предложил јавниот обвинител. Против ова решение странките имаат право на жалба до Кривичниот совет.