Зголемувањето на пензиите не значи автоматски и подобрување на квалитетот на животот на пензионерите, особено кога значителен дел од месечните примања се троши за лекови, медицински помагала и здравствени услуги.
Ова го посочи универзитетскиот професор Борче Треновски во емисијата „Ноќно студио“ на 4ТВ, објаснувајќи дека животниот стандард треба да се оценува според реалните потреби на различните категории граѓани.
„Имаме едно многу старо истражување кое покажува дека кај пензионерите околу 30 проценти од средствата одат за лекови и медицински помагала. Кај младите, кај студентите, не одат ни два процента“, истакна Треновски.
Професорот нагласи дека станува збор за постаро истражување, кое сепак ја илустрира разликата во трошоците меѓу генерациите.
Според него, токму затоа државата треба да развива мерки приспособени на потребите на различните групи население.
Треновски раскажа и за неодамнешна средба со пензионери, на која разговарале за тоа како се променил животниот стандард во Македонија од осамостојувањето до денес.
„Ги прашав дали живеат подобро од пред 1991 година. Ми одговорија: ‘Професоре, сега имаме поголема пензија, живееме подобро, но сме понезадоволни и понесреќни’“, раскажа тој.
Професорот објасни дека чувството на задоволство зависи од многу повеќе фактори отколку само од висината на месечните примања.
Меѓу нив ги издвои достапноста на здравството, квалитетот на јавните услуги, животната средина и трошоците што граѓаните мора дополнително да ги плаќаат.
Според Треновски, вистинското подобрување на стандардот подразбира не само повисоки пензии, туку и подобри услуги и помали дополнителни трошоци за највозрасните граѓани.