Познатиот бугарски бизнисмен, поранешен европратеник и спортски функционер Слави Бинев е убиен утрово во софиската населба „Павлово“. Информацијата ја потврди Главната дирекција „Национална полиција“ за бугарската телевизија НОВА, а полицијата веќе приведе тројца осомничени за убиството.
Пријавата за убиството била примена во 10:28 часот по локално време. Екипата на Итната медицинска помош пристигнала на местото за само седум минути, но лекарите можеле единствено да ја констатираат смртта на бизнисменот.
Околу еден час по пријавувањето на убиството, полицијата уапсила тројца мажи на 54. километар од автопатот „Тракија“, во близина на тунелот „Трајанови врата“.
Според главниот секретар на бугарското Министерство за внатрешни работи, Љубомир Николов, двајца од приведените имаат турски имиња, додека третиот поседува бугарска лична карта.
Осомничените биле гости во домот на Бинев и се занимавале со градежништво. Работеле на изградба на два станбени комплекса во Софија, но засега нема информации за деловна поврзаност меѓу убиениот бизнисмен и градежната компанија.
При полициската интервенција биле пронајдени две парчиња огнено оружје. Едното било фрлено пред запирањето на автомобилот, додека второто било пронајдено во чанта кај еден од приведените.
Според информациите на НОВА, убиството го пријавил работник во куќата на Бинев. Тој раскажал дека во домот пристигнале неколку лица, по што се слушнале истрели. Кога отишол да провери што се случува, го пронашол бизнисменот мртов.
При увидот била пронајдена една чаура, а на телото на Бинев била констатирана прострелна рана во пределот на главата.
Првичните сомневања на истражителите се дека мотив за убиството биле нерасчистени финансиски односи. Главниот секретар Николов изјавил дека во оваа фаза нема доволно основи случајот да се квалификува како нарачано убиство.
Кој беше Слави Бинев?
Слави Бинев беше една од познатите личности во бугарскиот бизнис, политиката и спортот. Тој беше претседател на Бугарската таеквондо федерација и потпретседател на Бугарскиот олимписки комитет.
Беше и член на Советот на Светската таеквондо федерација, со што стана првиот Бугарин избран во 14-членото раководно тело на светското олимписко таеквондо. Ја извршуваше и функцијата прв потпретседател на Европската таеквондо унија.
Политичката кариера ја започна во партијата „Атака“, од чија листа во 2007 година беше избран за пратеник во Европскиот парламент. Во 2009 година освои втор мандат, а во 2011 година ја напушти партијата.
Подоцна формираше сопствена политичка партија, а во 2014 година беше избран за пратеник во бугарското Народно собрание од редовите на Националниот фронт за спас на Бугарија.
Истата година беше избран за претседател на парламентарната Комисија за култура, но по протестите и реакциите во јавноста поднесе оставка.
Во знак на почит кон Бинев, 13. меѓународен турнир во олимписко таеквондо, кој се одржува во Софија, ќе започне со едноминутно молчење во негова чест.