Потресен случај на сомневање за долготрајно занемарување на животно во Куманово. Куче по име Луна, од расата германски овчар, е спасено од напуштен базен длабок меѓу три и пет метри, каде што, според здружението „Анимал Рескју Проџект“, било заробено речиси две години.
Луна била изложена на екстремни горештини, студ, дожд и снег, додека дел од локалните жители повремено ѝ спуштале храна и вода со јаже.
По сложената спасувачка акција, кучето било пренесено во ветеринарна амбуланта во критична состојба. Тежи само 10 килограми, екстремно е исцрпено и дехидрирано, а неговиот живот сè уште е во опасност.
При прегледот било откриено дека Луна има микрочип и регистриран сопственик. Засега не е познато како завршила во базенот.
Здружението побара итна реакција од Агенцијата за храна и ветеринарство, утврдување на околностите и евентуална одговорност на сопственикот.
„Успеавме да ја извлечеме Луна од бетонската дупка во која поминала речиси две години. Сега се бориме да ја одржиме во живот“, порачаа од здружението.