Повеќе од 1.300 кривични дела поврзани со семејно насилство се евидентирани во Македонија во првите девет месеци од 2026 година, покажуваат податоците на Министерството за внатрешни работи. Во овој период биле пријавени 1.388 сторители и 1.433 жртви, при што жените се најзастапени меѓу лицата кои претрпеле насилство.
Според статистиката на МВР, од вкупно 1.388 пријавени сторители на кривични дела од областа на семејното насилство, 1.278 се мажи, а 110 жени. Од 1.433 жртви, 1.144 се жени, додека 289 се мажи.
Покрај кривичните дела, во периодот јануари – септември биле регистрирани и 191 прекршок поврзан со семејно насилство. За нив се пријавени 228 сторители, од кои 196 мажи и 32 жени, како и 221 жртва – 126 мажи и 95 жени.
Загрижувачки се и податоците за поплаките. Во истиот период биле евидентирани 3.869 поплаки за семејно насилство, при што се пријавени 3.971 сторител и 3.961 жртва. Меѓу пријавените сторители има 3.090 мажи и 881 жена, додека меѓу жртвите 2.567 се жени, а 1.394 мажи.
Од Министерството за внатрешни работи апелираат граѓаните да не молчат и да не го премолчуваат насилството, туку навремено да го пријавуваат секој случај. Посочуваат дека пријавувањето е важно и кога станува збор за лица кои имаат сознанија дека некој друг е жртва на семејно насилство.
Случаите може да се пријават во најблиската полициска станица или на телефонските броеви 112 и 192.