Американскиот претседател Доналд Трамп повторно ја изрази својата силна поддршка за развојот на суперинтелигенцијата (СИ), оценувајќи дека оваа технологија може да донесе огромно богатство за американските сојузни држави. Тој најави дека ќе соработува со оние држави кои ќе покажат интерес за инвестирање во нејзиниот развој.
Во објава на социјалната мрежа „Трут соушл“, Трамп порача дека целосно го поддржува развојот на суперинтелигенцијата и дека е подготвен да соработува со повеќе американски сојузни држави кои сакаат да остварат економски придобивки од оваа технологија.
„Како претседател, 100 отсто ја поддржувам супер-интелигенцијата (СИ) и ќе соработувам со бројни американски сојузни држави кои сакаат да се збогатат благодарение на неа. Тоа е злато и само будалести лидери би рекле НЕ на богатството што го носи“, напиша Трамп.
Големи инвестиции во вештачката интелигенција
Изјавата на американскиот претседател доаѓа во период на интензивни инвестиции во инфраструктурата за вештачка интелигенција во САД, особено во изградбата на центри за податоци и компјутерски системи неопходни за развој на напредни модели на вештачка интелигенција.
Ваквите проекти можат да привлечат значителни финансиски средства и да отворат нови работни места, но истовремено бараат огромни количества електрична енергија. Дополнителен предизвик е и потрошувачката на вода, која се користи за ладење на одредени компјутерски системи.
Трамп во својата објава не откри со кои конкретни сојузни држави планира да соработува, ниту, пак, наведе проекти или финансиски износи што би биле вложени во развојот на суперинтелигенцијата.