Во центарот на Скопје започна протестниот марш против фемицидите, организиран по трагичното убиство на 17-годишната Билјана Кириќ од Богданци. Под мотото „Ниту една повеќе!“, граѓаните излегоа на улиците со барање за правда, институционална одговорност и итни мерки за спречување на насилството врз жените.
Со транспаренти и пораки „Не бараме сочувство, бараме одговорност“ и „Истата полиција, истите институции, истите пропусти“, демонстрантите предупредуваат дека трагедијата можела да биде спречена.
Тие потсетуваат дека Билјана претходно пријавувала насилство и дека била изречена судска мерка за заштита, но тоа не било доволно за да се спречи нејзиното убиство.
Протестниот марш се движи низ централното градско подрачје, покрај Собранието и министерствата, а учесниците бараат санкционирање на евентуалните институционални пропусти, законски измени и конкретни чекори за заштита на жртвите.
Главната порака од протестот е дека насилството врз жените мора да се спречува навреме, а институциите да преземат одговорност пред да биде изгубен уште еден човечки живот.