Македонија

Обвинетиот за нападот врз партнерката во Охрид спроведен во 30-дневен притвор

Обвинетиот за нападот врз партнерката во Охрид спроведен во 30-дневен притвор

Триесет и едногодишниот охриѓанец обвинет за нападот врз својата 26-годишна партнерка е спроведен во затворот во Охрид, каде што му е определен 30-дневен притвор. Обвинителството го товари за три кривични дела — телесна повреда, противправно лишување од слобода и загрозување на сигурноста.

Одлуката следувала по дополнителните дејствија на Обвинителството и повторното приведување на обвинетиот, кому првично му биле определени мерки на претпазливост.

„При вршење семејно насилство обвинетиот противправно ја затворил, физички ја нападнал, телесно ја повредил и ја загрозил сигурноста на една оштетена“, се наведува во соопштението на Обвинителството.

Во текот на постапувањето, оштетената била испитана во присуство на социјалните служби, а било извршено и вештачење за видот и карактерот на нејзините повреди.

Повредената жена е испишана на домашно лекување од Специјалната болница за ортопедија и трауматологија „Св. Еразмо“. Според лекарите, нејзината здравствена состојба е добра.

Нападот се случил на 15 ноември, околу два часот по полноќ. Според информациите од МВР, расправијата започнала во домот, а продолжила во автомобилот на обвинетиот.

Случајот предизвика и политички реакции. Форумот на жени на СДСМ повика на протест пред седиштето на МВР во Охрид, под слоганот „Стоп за насилството врз жените и фемицидот“, обвинувајќи ги институциите за ненавремено постапување.

Пратеничката Јованка Тренчевска побара политичка одговорност од министерот за внатрешни работи Панче Тошковски, тврдејќи дека потфрлиле превенцијата и постапувањето на полицијата.

Од ВМРО-ДПМНЕ го осудија нападот, но ја обвинија СДСМ дека го политизира случајот и се обидува да добие политички поени преку повикот за протест.

Паралелно се води постапка и против таткото на повредената жена, по пријава за закани кон семејството на обвинетиот. Против него е поднесена кривична пријава за загрозување на сигурноста и му се определени мерки на претпазливост.

Ноќно студио

Најнова епизода

Продажба или стечај за Алта банка? Ноќно студио со Славко Лазовски 12.11.2026

Сите епизоди →
Имате вест, приказна или проблем? Пишете ни