Македонија

Цанов објави нови разговори со Ива Михаилова: Тврди дека помошта за рехабилитација ѝ била условена со интервју

Цанов објави нови разговори со Ива Михаилова: Тврди дека помошта за рехабилитација ѝ била условена со интервју

Бугарскиот јутјубер Станислав Цанов објави ново видео со пораки и снимени разговори за кои тврди дека покажуваат притисок од бугарската Државна агенција за национална безбедност (ДАНС) врз Ива Михаилова. Според него, таа морала прво да гостува кај новинарот Мартин Карбовски за да ја добие помошта за рехабилитација, а по објавувањето на првото видео побарала од Цанов да го повлече, изразувајќи страв за себе и за своето семејство.

Михаилова претходно јавно негираше дека била принудувана да прави нешто во Бугарија, а ДАНС ги отфрли обвинувањата за притисок. Автентичноста и целосниот контекст на материјалите што ги објавува Цанов не се независно потврдени.

Во новото видео, Цанов прикажува преписка за договарање интервју и раскажува дека снимањето требало да се одржи на 3 ноември. Според неговото сведочење, вечерта претходно Михаилова побарала итно да се сретнат, бидејќи не сакала по телефон да му објасни што се случило.

Цанов тврди дека на средбата таа му кажала оти од ДАНС побарале прво да даде интервју за Карбовски. Во објавените делови од разговорот, гласот што тој го претставува како Михаилова зборува за наводна можност службите да влијаат врз прашањата во тоа интервју.

Во продолжението е објавен и разговор што, според Цанов, бил воден преку апликацијата Signal на 7 ноември, по објавувањето на гостувањето кај Карбовски.

„Ми кажаа дека ако не снимам прво кај него, каде и да снимам на друго место, ќе биде избришано и дека нема да ја добијам рехабилитацијата што ми е потребна“, се слуша во снимката што Цанов ја претставува како разговор со Михаилова.

Тој прикажува и порака во која, според него, таа го прашува кога ќе снимаат, наведувајќи дека веќе има право на тоа и дека го исполнила барањето што ѝ било поставено.

Посебен дел од видеото е посветен на комуникацијата по објавувањето на првиот материјал за наводниот притисок. Цанов тврди дека Михаилова повеќепати му се јавувала и барала да го отстрани видеото.

„Крени ми, зашто сите ќе умреме уште вечерва“, гласи една од пораките што ги прикажува. Во друга, според него, таа изразува страв дека последици ќе имаат и нејзините родители. Цанов вели дека пораките подоцна биле избришани, но претходно направил видеоснимка од преписката.

Објавен е и дел од телефонски разговор со жена што тој ја претставува како мајката на Михаилова. Таа бара во материјалот да не се споменуваат службите.

„Секој ден разговарам со нив и ми го кажаа тоа. Тоа се условите, да не се споменуваат службите“, се слуша во објавениот разговор.

Цанов вели дека е подготвен да ги достави оригиналните снимки на институција што би ја проверила нивната автентичност. Тој одбива да го повлече видеото, тврдејќи дека јавноста треба да биде запознаена со наводите.

Наспроти неговите тврдења, Михаилова на 15 ноември објави дека во Бугарија добила помош и поддршка.

„Сакам да нагласам дека никој во Бугарија не ме принудувал да правам што било. Тука добив помош, грижа и поддршка“, напиша таа, барајќи да биде оставена да се лекува во мир. Во објавата не се изјасни за автентичноста на снимките.

ДАНС, пак, соопшти дека нејзини службеници не вршеле притисок врз Михаилова и оцени дека агенцијата се вовлекува во политички и медиумски спротивставувања преку снимки со непотврдено потекло и недокажана веродостојност. Карбовски претходно негираше дека е агент на ДАНС.

Михаилова се наоѓа во Бугарија, а во Основниот суд во Кочани ѝ се суди во отсуство за сообраќајната несреќа на патот Штип – Кочани во која загина 33-годишниот Бесим Дурмиши. На рочиштето на 9 ноември судот го одби нејзиното барање да учествува преку видеоврска од Бугарија.

Ноќно студио

Најнова епизода

Продажба или стечај за Алта банка? Ноќно студио со Славко Лазовски 12.11.2026

Сите епизоди →
Имате вест, приказна или проблем? Пишете ни