НАЈМАЛКУ шест лица загинаа, а 46 се повредени во сериозна автобуска несреќа на федерален автопат во југоисточен Бразил во понеделник. Повредените се однесени во локалните болници, соопштија пожарникарите во државата Сао Паоло, пренесува Ројтерс.
Пожарникарите објавија на социјалните мрежи дека несреќата на автопатот BR-153 се случила во раните утрински часови во близина на градот Марилија. Засега нема информации за сериозноста на повредите на патниците.
Локалните медиуми, повикувајќи се на федералната сообраќајна полиција, објавија дека автобусот превезувал земјоделски работници. Тие патувале од североисточната држава Маранхао на југ кон државата Санта Катарина, каде што требало да работат на бербата на јаболка.
Според бразилскиот весник „Фолха де С. Паоло“, несреќата се случила откако пукнала задната лева гума на возилото. Како резултат на тоа, возачот ја изгубил контролата врз автобусот, кој потоа излетал од патот и се превртел.