ПО жестоката изборна кампања, Бразилците денеска излегуваат на гласање за да изберат нов претседател, а главни претседателски кандидати се актуелниот претседател, десничарскиот Жаир Болсонаро и левичарскиот поранешен претседател Луис Инасио Лула да Силва, кој беше во моќност од 2003 до 2010 година.
Анкетите му даваат јасно водство на Лула, но Болсонаро однапред изрази сомнеж за изборниот систем и навести дека можеби нема да ги признае резултатите од изборите, кои ја поделиа најголемата економија во Латинска Америка. Во нивната последна дебата пред изборите во недела, двајцата кандидати разменија обвинувања за корупција и малку разговараа за предлозите за управување со јужноамериканската земја.
Поддржувачите на Болсонаро повикаа на воен удар
Болсонаро го нарече својот левичарски ривал шеф на криминална група која раководеше со „клептократија“ за време на два претседателски мандати и „крадец“ затоа што поранешниот претседател беше затворен за корупција.
Лула, кој има двоцифрено водство пред првиот круг на гласање, го нарече Болсонаро „бесрамен“ лажго чија влада прикрила мито за да купи вакцини за време на пандемијата „Ковид-19“, во која загинаа повеќе од 680.000 Бразилци. Тој, исто така, го обвини за „геноцид“ за неговата колеблива политика во борбата против коронавирусот.
Најмалку тројца приврзаници на Лула беа убиени во последните месеци, а приврзаниците на Болсонаро се осомничени за овие убиства. Поддржувачите на актуелниот претседател постојано отворено повикуваа на воен удар.
Судот го одобри распоредувањето на вооружените сили
Над 156 милиони луѓе имаат право на глас на претседателските избори во недела. Победникот може да биде објавен во рок од неколку часа по затворањето на гласачките места во 17 часот по бразилско време (22 часот по средноевропско време).
Високиот изборен суд го одобри распоредувањето на вооружените сили во 568 општини на денот на изборите за да се осигура дека граѓаните ги користат своите избирачки права.
Бразилците, исто така, во недела гласаат за сите 513 членови на Долниот дом на Конгресот, една третина од 81-члениот Сенат и државните гувернери и законодавни тела. Гласањето е задолжително.
Доколку ниту еден од претседателските кандидати не добие повеќе од 50 отсто од гласовите во првиот круг, двајцата кандидати со најмногу гласови ќе се соочат во вториот круг на 30 октомври.