Премиерот на Албанија Еди Рама ги коментираше најновите случувања на Блискиот Исток, нагласувајќи дека Албанија, како членка на НАТО, останува безбедна.
Во својот подкаст „Фласим“, Рама ја истакна солидарноста со погодените земји, вклучувајќи ги Кипар, Грција и Турција, додека ја опиша ситуацијата во регионот како сложена и тешка за предвидување.
„Секако, како и сите други, и ние сме погодени – за среќа не физички, туку секако политички, емоционално и човечки – од неодамнешните случувања на Блискиот Исток и од ескалацијата на безбедносната ситуација во регион каде што имаме извонредни пријатели. Горди сме што сме една од ретките земји што одржуваат силни пријателства и со Израел и со земјите од Персискиот Залив – Саудиска Арабија, Обединетите Арапски Емирати, Катар, Кувајт и Бахреин – кои беа во домет на агресија од убијците на Техеран. Ситуацијата останува комплицирана и тешко е да се предвиди крајот на офанзивата што ја започнаа, со право, Соединетите Американски Држави во тесен сојуз со Израел за еднаш засекогаш да ја спречат можноста опскуристичкиот режим на Хомеинистичката Република Иран да произведе атомска бомба“, рече Рама.
„Во овој момент, секако, за нас како и за многу други земји, главен приоритет е безбедноста на албанските граѓани кои се наоѓаат во тие земји. Нашите дипломатски мисии и конзулати во регионот се во постојан контакт и со нас и со локалните власти. Тие прават сè што е можно за да ја следат ситуацијата, да ги информираат луѓето и да обезбедат помош. Во меѓувреме, прашањето за летовите останува предизвик за сите“, додаде тој.
