И покрај напорите за санирање на вчерашниот пожар, депонијата „Краста“ во Куманово сè уште не е целосно изгасната и продолжува да чади. Екипите на ЈП „Чистота и Зеленило“ се на терен и го засипуваат теренот со земја за да го запрат огнот, но порачуваат дека за справување со овој долгогодишен проблем им е потребна итна помош од државните институции.
Директорот на претпријатието, Сашо Томиќ, истакна дека ова е хроничен проблем кој ги надминува нивните капацитети. Тој веќе упатил апел за поддршка во опрема и механизација до Владата, Општината Куманово и Центарот за управување со кризи (ЦУК).
Во моментов, на терен се интервенира со само две машини – една сопствена и една изнајмена од приватна фирма. Дополнителен проблем прави ветерот кој повторно го разгорува огнот, како и ослободувањето на гасот метан.
„Како што санираме едни делови, на други се појавува нов чад поради метанот. Земја нанесуваме секојдневно, но за целосна санација ни се потребни дополнителни градежни машини и булдожери“, изјави Томиќ.
Од претпријатието додаваат дека работат и на отстранување на забелешките посочени од Државниот инспекторат за животна средина, но нагласуваат дека без посериозна системска поддршка, депонијата „Краста“ ќе остане висок ризик.