Новозеландската премиерка Џасинда Ардерн ќе се сретне со американскиот претседател Џо Бајден денеска во Белата куќа, каде што очекува двајцата да разговараат за тековната посветеност на САД кон индо-пацифичкиот регион, објави Ројтерс.
„Најважно за нас, заедно со ситуацијата во Украина, е ситуацијата во нашиот регион“, изјави Ардерн за новозеландските медиуми на прес-конференција во Вашингтон. „Ќе продолжиме да ги охрабруваме САД да продолжат и да го зајакнат својот ангажман во нашиот регион, вклучително и економски, што е од суштинско значење за регионот“, рече таа.
Состанокот стана поважен бидејќи Нов Зеланд во последните недели изрази загриженост за присуството на Кина во регионот по веста дека Пекинг потпишал безбедносен пакт со Соломонските Острови.
Кина презеде чекори за да го зголеми своето влијание, а министерот за надворешни работи на земјата моментално е во Тонга на широка турнеја низ регионот.
Ардерн рече дека очекува да се сретне и со потпретседателката Камала Харис и со државниот секретар Ентони Блинкон и со американскиот индо-пацифички координатор Курт Кембел.
Премиерот е во САД како дел од трговската делегација која го промовира Нов Зеланд и неговиот бизнис. Ардерн одржа говор пред дипломирани студенти на Универзитетот Харвард.
