Трагедијата на руската планина Елбрус, во која животот го загубија петмина планинари од Босна и Херцеговина, крие уште една потресна приказна за безусловна љубов и верност. Спасувачките тимови, покрај телата на сопружниците Алма и Денис Окановиќ, ја пронашле мртва и нивната мачка Мацика.
За оние кои ги познаваа Алма и Денис, Мацика не беше само домашно милениче – таа беше рамноправен член на семејството и неизоставен дел од сите нивни животни авантури.
Од вдомено маче до вистинска планинарска ѕвезда
Нивната заедничка приказна започнала пред неколку години кога парот одлучил да вдоми маче кое набрзо станало нивен неразразделен сопатник. Наместо монотон живот меѓу четири ѕида, Мацика со своите сопственици ги истражувала планините, шумите и највисоките врвови, прераснувајќи во вистинска планинарска атракција.
Заедно со Алма и Денис, таа освојувала врвови на над 3.000 метри надморска височина, поминувајќи низ бројни планински предели во Босна и Херцеговина, регионот и ширум Европа.
На фотографиите кои парот редовно ги споделуваше на социјалните мрежи, Мацика секогаш беше во прв план – на рамената на своите сопственици, ѕиркајќи од планинарскиот ранец или гордо позирајќи на освоените врвови. Поради ова необично пријателство, нивната Фејсбук страница „Трио Фантастико“ (Trio Fantastiko) ја следеа илјадници луѓе кои со голем интерес ги очекуваа нивните нови подвизи.
Последниот заеднички поглед од покривот на Европа
Последните фотографии објавени пред големата несреќа ја прикажуваа Мацика за време на процесот на аклиматизација на суровиот Елбрус. Како и стотици пати претходно, таа верно чекореше рамо до рамо со Алма и Денис.
Според официјалните информации од спасувачките служби, мачката била пронајдена во планинарскиот ранец, веднаш до телата на нејзините сопственици. До самиот последен и трагичен момент, Мацика остана со луѓето кои не само што ѝ подарија дом, туку ѝ овозможија и несекојдневен живот исполнет со патувања, природа и планинарски авантури.