По повод 5 Октомври – Светскиот ден на учителите, Сојузот на просветни работници и Министерството за образование и наука (МОН) денеска доделија признанија на тринаесет најдобри наставници и воспитувачи за учебната 2025-2026 година.
На традиционалниот настан насловен „Учителот инспирира, ученикот создава – заедно го обликуваат светот на знаењето“, беа истакнати поединците кои со својот труд, посветеност и професионалност се издвоија во процесот на образование и воспитание.
Наградени просветни работници по категории:
- Предучилишно образование: Клементина Петрушевска (детска градинка „Весели цветови“ – Кисела Вода).
- Одделенска настава: Соња Трифуновска (ОУ „Гоце Делчев“ – Тетово), Виолета Поповска (ОУ „Вера Јоциќ“ – Гази Баба), Габриела Мерџаноска (ОУ „Гоце Делчев“ – Гостивар), Ксенија Николова (ОУ „Гоце Делчев“ – Босилово) и Весна Тодоровска-Унковска (ОУ „Партенија Зографски“ – Кисела Вода).
- Предметна настава: Томе Китановски (ОУ „Гоце Делчев“ – Василево), Бојанка Џипунова-Ташова (ОУ „Васил Главинов“ – Велес), Вера Зороска (ОУ „Христо Узунов“ – Охрид), Оливера Шиклеска-Грозданова (ОУ „Ѓорѓи Сугарев“ – Битола) и Благица Чатлеска (ОУ „Гоце Делчев“ – Прилеп).
- Средно образование: Никола Делевски (РЦСОО „Никола Карев“ – Струмица), додека постхумно признание му беше доделено на Слаѓан Станковиќ – Битрак (СОУ „Наце Буѓони“ – Куманово и МИГ – Скопје).
Признанијата ги врачија министерката за образование и наука Весна Јаневска и претседателката на Сојузот на просветни работници, Жаклина Ристовска.
Министерката Јаневска им порача на наградените да бидат горди и да продолжат да бидат двигатели на образованието. Таа нагласи дека наставникот останува најважниот столб во училиштето, најавувајќи ново покачување на платите за март, по веќе реализираното зголемување од 20% во изминатите две и пол години. Осврнувајќи се на дефицитот од кадар по природни науки, Јаневска истакна дека се преземаат чекори за враќање на достоинството и значењето на наставничката професија.
Претседателката на Сојузот, Жаклина Ристовска, подвлече дека во ера на брзи технолошки промени и вештачка интелигенција, улогата на учителот не се намалува, бидејќи тој е оној кој ја дава инспирацијата, го препознава талентот и ја гради самодовербата кај учениците.