Државниот завод за ревизија (ДЗР) изрази мислење со резерва за финансиските извештаи и за усогласеноста со законите во работењето на Националната установа Албански театар во Скопје за 2024 година. Во објавениот извештај, ревизорите детектираа сериозни слабости во финансиското и административното управување со оваа културна институција.
Меѓу клучните забелешки се издвојуваат недостатоците при пописот на средствата, непостоењето материјална евиденција, како и запишувањето на градежни објекти во книгите без претходно обезбедени акти за сопственост (имотни листови).
Пропусти во тековното работење: Иако за дел од опремата и материјалните средства веќе има одобрение за употреба, тие во сметководството сè уште се водат како „средства во подготовка“. Дополнително, театарот немал дефиниран систем за набавка и задолжување со ситен инвентар, а утврдени се и слабости во водењето на евиденцијата за работното време на вработените.
Театарот продавал билети без официјален ценовник Ревизијата открива дека во Албанскиот театар не се евидентирале излезните документи во деловникот, а институцијата немала донесено ниту официјален акт за утврдување на цените на билетите.
Во посебниот дел за „Нагласување на прашања“, ДЗР алармира и за следниве нерегуларности:
- Нерегулиран начин на користење на движниот и недвижниот имот на театарот.
- Функционирање на Управниот одбор без законски потребниот број членови.
- Недоследности во организацијата и систематизацијата на работните места.
- Нерегулиран закуп на деловниот простор и користењето на паркингот за посетители.
Со цел да се надминат овие системски пропусти и да се подобри законското работење на установата, Државниот завод за ревизија испорача вкупно 13 препораки кои раководството на театарот ќе мора итно да ги спроведе.