Двајца мажи загинаа, а уште четворица се ранети во тешка престрелка на најголемиот латино уличен фестивал во Канада, што во саботата се одржуваше во Торонто, соопшти полицијата.
Вкупно шест лица беа застрелани, а се верува дека повеќе осомничени сè уште се во бегство по инцидентот на фестивалот „Салса на Сент Клер“, изјави заменик-началникот на Полицијата на Торонто Френк Баредо на доцновечерна прес-конференција. Обете жртви се мажи, додека четворицата повредени се префрлени во болници со тешки повреди.
Истрагата засега опфати три обезбедени места на злосторството и два пронајдени примероци огнено оружје, но, според него, нема тековна закана по јавната безбедност. „Се работи за размена на оган меѓу двајца поединци кои се целеле меѓусебно“, рече Баредо, додавајќи дека пукањето „безразложно доведе во опасност огромен број луѓе“.
Во паника, посетителите на фестивалот трчаа по тротоарите додека полицијата ја ограничуваше областа со жолта лента, а кон местото пристигнуваа црни полициски теренци и патролни возила, тешки оклопни возила и амбуланти, покажаа снимките на Си-Ти-Ви.
Новинарката Џоана Лавоа од канадската медиумска куќа Си-Пи 24, која присуствувала на настанот, изјави дека „расположението во моментот се смени“ кога одекнаа истрелите. Таа за Си-Пи 24, партнерска телевизија на Си-Ен-Ен, рече дека видела жена која изгледало дека е застрелана и дека имала тешки повреди. „Сите беа во шок и страв. Ситуацијата беше застрашувачка. Дојдовме да се забавуваме… не очекувавме вака нешто, тоа беше последното на што мислевме“, рече Лавоа.
Валери Родригез за Асошиетед прес изјави дека седела пред ресторан кога слушнала врисоци и видела луѓе како бегаат. „Неколкумина ни рекоа да легнеме на подот“, рече таа.
Полицијата соопшти дека ја обезбедила локацијата околу еден час по почетокот на пукањето, но и понатаму ги повикуваше граѓаните да ја избегнуваат областа во централниот дел на градот, каде повеќедневниот фестивал посветен на латино културата се одржува веќе 22 години, според организаторите.
Градоначалничката на Торонто Оливија Чау ја осуди престрелката како „непромислен, одвратен чин на насилство на преполн фестивал“ и вети дека надлежните ќе работат неуморно за идентификација на осомничените. „Ќе се погрижам Полицијата на Торонто да ги има сите потребни ресурси за да ги пронајде одговорните и ќе продолжиме да работиме деноноќно за да го тргнеме оружјето од нашите улици“, напиша таа во објава на Икс. Чау и полицијата ги повикаа сите посетители што имаат снимки или информации да се јават во полиција.
Премиерот на Канада Марк Карни во соопштение рече дека е „запрепастен“ од смртоносната престрелка на преполниот фестивал во Торонто. „Моите молитви се со семејствата што тагуваат по своите најблиски и со сите погодени од овој ужасен настан“, напиша Карни.
Иако смртоносното огнено насилство е поретко во Канада отколку во САД, последиците се разорни за заедниците. Помалку од три недели претходно, земјата беше потресена од уште едно масовно пукање кога напаѓач отвори оган во Монтреал. Во следната размена на оган со полицијата беа убиени две лица, меѓу кои и полициски службеник — прв ваков случај во Монтреал по две децении.
По најсмртоносното масовно убивање во поновата историја на Канада, во Нова Шкотска во 2020 година, кога беа убиени 22 лица, владата спроведе големи реформи и забрани за оружје од нападен тип.