Машиновозачот на брз воз во јужна Кина загина, а осум лица се повредени откако два вагони на возот утринава излетаа од шините поради лизгање од кал, јави Асошиетед прес, повикувајќи се на државната телевизија.
Несреќата се случила на влезот во тунел во јужната провинција Гуижоу. Возот редовно патувал до крајбрежниот економски центар Гуангжу.
Ранетите се во стабилна состојба. 136 лица се евакуирани од возот на безбедно, јави кинеската телевизија.
Причините за несреќата се истражуваат. Одроните станаа вообичаена појава во областа поради комбинацијата на обилни дождови и развојот на инфраструктурата во планинските области, забележува АП.
Кина ја има најголемата брза железничка мрежа во светот, со вкупна должина на пругата од 40.000 километри, а возовите сообраќаат со повеќе од 300 километри на час. На него секоја година се превезуваат стотици милиони патници, иако протокот е значително намален поради ограничувањата поврзани со пандемијата КОВИД-19.
Нивото на безбедност на системот во целина е добро, забележува АП. Единствен исклучок е судирот во 2011 година на два воза во близина на јужниот град Венжоу, во кој загинаа најмалку 40 луѓе и предизвика гнев во јавноста поради очигледниот обид да се прикрие вистинската големина на штетата.
