Кина направи големи напори за време на владеењето на претседателотСи Џинпинг за да постигне самоодржливост во клучните области како што се технологијата и плаќањата за да се намали изложеноста на економски притисоци поради трговијата и политиката кон Тајван.
Руската инвазија на Украина и острата реакција на меѓународната заедница, која вклучува протерување на руските банки од механизмот СВИФТ и замрзнување на руските средства, може да послужи како студија на случај за економската и финансиската ранливост во Кина.
Неочекувано строгите санкции наметнати од Западот покажаа колку силно влијаат врз Русија, вклучително и зависноста од американскиот долар. Кина се обидува да спречи такво сценарио доколку стане цел на западните санкции.
Потпирање на сопствени акции
Кинеско-американската трговска војна за време на мандатот на Трамп ја принуди најнаселената земја во светот да се фокусира на набавка на доволно количества сопствени залихи. Санкциите против Русија се вистински повик за будење, изјави Абрахам Џанг, извршен директор на кинескиот европски капитал инвестициски фонд во Шенжен.
„Покрај изворите на храна, на Кина и требаат нафта и индустриски постројки и доколку еден ден би била отсечена од надворешните извори на ресурси како што е Русија денес, би преживеала таков удар поради многу мала потреба од увоз“, рече Џанг.
Во последниве години, Кина инвестираше во домашно производство на технолошки производи, од полупроводници до материјали за авиони, за да ја намали својата зависност од увоз. Санкциите на своја кожа ги почувствува технолошкиот гигант Хуавеј, поради што изгуби пристап до квалитетни чипови.
„Кина мора да го забрза развојот на клучните технологии. Во спротивно, ќе биде предоцна ако се соочи со санкции, што може да се види на примерот на Русија“, рече Џанг.
Поголема економија
За разлика од руската економија, кинеската економија е многу поголема и поразновидна, иако зависи од увозот на енергија и храна и во голема мера се потпира на глобалната трговија како земја со најголема трговија во светот.
Понатаму, Украина не е Тајван, кој Пекинг сака да го врати под своја контрола, дури и по цена на употреба на сила.
Во овој случај, политичките и геостратешките околности се сосема различни, но Кина секако може да очекува одговор во случај на напад на остров контролиран од демократска влада што е, меѓу другите фактори, клучна точка во глобалниот синџир на снабдување со технологија.
Бидејќи САД ја отфрлија можноста за воена интервенција во Украина, нивната политика кон Тајван, која вклучува зајакнување на одбранбените врски со островот и зајакнување на продажбата на оружје и формирање трилатерален пакт меѓу САД, Австралија и Обединетото Кралство, е предупредување.
Кина не ја осуди руската инвазија на Украина, а причината за војната во Источна Европа ја гледа во проширувањето на НАТО.
Тајван не пријавил никакви невообичаени движења на кинеската војска од избувнувањето на војната во Украина. Американскиот претседател Џо Бајден испрати делегација од поранешни високи функционери на островот во знак на поддршка.
Валути и плаќања
Кина се обиде да ја интернационализира својата валута во последниве години, барајќи трговијата, вклучително и со Русија, да се одвива во јуани. Јуанот сочинуваше 13,1 отсто од девизните резерви на централната банка на Русија минатиот јуни, во споредба со само 0,1 отсто во јуни 2017 година.
Кинеската централна банка развива дигитална валута која треба да ја поттикне трговијата со јуани, но проектот се уште е во почетна фаза.
Кина има алтернативен систем за заобиколување на SWIFT, прекуграничниот меѓубанкарски систем за плаќање (CIPS), кој забележа зголемување од 75% во трансакциите минатата година, иако 80% од CIPS трансакциите сè уште го вклучуваат SWIFT.
Берт Хофман, директор на Источноазискиот институт на Националниот универзитет во Сингапур, рече дека Кина е загрижена поради доминацијата на доларот во меѓународните плаќања од глобалната финансиска криза.
„Санкциите ќе ја забрзаат Кина да смисли алтернативни решенија, вклучувајќи систем CIPS предводен од Кина и понатамошна интернационализација на јуанот.
Загриженост за изолација
Експертите сметаат дека Русија не очекувала обединета реакција од дипломатските кругови, што би можело да биде лекција за Пекинг. Иако САД не испратија војници во Украина, неочекувано бавното напредување на руските сили е изненадувачки.
Кинезите најмногу се плашат од американска интервенција во случај на напад на Тајван, изјави Јун Сун, директор во Центарот Стимсон во Вашингтон.
„Формирана е широка коалиција која ја поддржува меѓународната изолација на Русија, поради што Кина е многу загрижена дека истото ќе и се случи ако оди во Тајван“, додаде Јун Сун.
Сепак, она што може да ја утеши Кина е тоа што земјите што се приклучија на санкциите останаа во малцинство. Покрај тоа, Кина се уште нема добиено санкции поради добрите односи со Русија.
Стив Цанг, директор на Кинескиот институт во Лондон, рече дека Пекинг нема многу причини да биде задоволен од развојот на настаните во Украина, но останува да се види какви ефекти ќе има одговорот на меѓународната заедница.
Ако Русија не падне на колена, „Кина нема да се плаши од реакцијата на Западот доколку одлучи да го врати Тајван под своја контрола“, рече тој.
„Доколку санкциите против Русија се покажат ефективни, Си Џинпинг ќе биде многу внимателен кога и како ќе се обиде да го освои одметнатиот остров во Јужното Кинеско Море“, додаде тој.
