„Вечерва многу деца во Палестина ќе одат да спијат гладни. Некои никогаш нема да се разбудат затоа што ќе бидат убиени од израелската војска. Само во Палестина мајката носи дете двапати, еднаш кога ќе се роди, вториот пат кога е убиена“, рече една девојка на денешниот митинг во Сараево која се претстави како Сара од Палестина.
„Но, тие нема да бидат убиени само од граната, туку и од тишината на целиот свет. Затоа што палестинските деца се само бројка во бројот на загинати. Зошто светот не вели дека со молчење ги убивал идните инженери, лекари, писатели и научници? Зошто на израелскиот агресор му се дозволува утре да ги убива оние кои би го спасиле овој свет“, рече во својот говор девојката Сара.
Министерството за здравство на Газа во саботата соопшти дека во израелските воздушни и ракетни напади како одмазда загинале најмалку 4.385 Палестинци, вклучувајќи 1.756 деца.
Повеќе од еден милион од 2,3 милиони луѓе на малата територија останаа без домови.
Хуманитарната ситуација во Газа е катастрофална, предупредија вчера пет агенции на ОН, посочувајќи дека болниците се „претрупани“ со ранети и дека децата „умираат со алармантна брзина“.
Светската здравствена организација, Светската програма за храна, УНИЦЕФ, Програмата за развој и Фондот за население потсетуваат во заедничкото соопштение дека хуманитарната ситуација во Газа била „очајна“ и пред конфликтот што започна на 7 октомври.
– Денеска е катастрофално. Има многу малку време пред стапката на смртност нагло да порасне поради појавата на болести и недоволните здравствени капацитети – додаваат тие, повикувајќи ја меѓународната заедница „да направи повеќе“ за да им помогне на жителите на Газа.
Појасот Газа, под израелска копнена, воздушна и морска блокада откако Хамас ја презеде власта таму во 2007 година, е сиромашна површина од 362 квадратни километри која е под „тотална опсада“ од 9 октомври од страна на Израел, кој му ја исклучи водата, електричната енергија и залихи на храна..
Деновиве многу градови низ светот одржуваат митинзи за поддршка на палестинскиот народ.