Силно невреме проследено со дожд, грмотевици и ветер попладнево зафати делови од Македонија. Тоа предизвикува отежнување на авио сообраќајот во земјава.
Во моментов два авиони, еден од Парис и друг од Белград не може да слетаат на меѓународниот аеродром „Скопје“ поради лоши временски услови.
Обиди за слетување воопшто немало, дознава 4NEWS.mk а и двата авиони добиле наредба да го променат курсот на летање поради невремето во овој дел од Македонија.
Невремето утрово го најавивме заедно со нашите партнери Weather4All.
Врнежите од дожд и ветер се очекува да се засилат во попладневните часови и да се интензивираат утре особено во делови од Македонија.
„Југозападно од Скопје се формира нестабилно облачно јадро, со услови за пороен дожд, силен ветер, грмежи и појава на град“, информираа од УХМР.
МЕТЕО ПРЕДУПРЕДУВАЊЕ: Денес ќе дува засилен, наместа повремено силен ветер од јужен правец (над 70 км/час). Под влијание на циклонска активност во вечерните и ноќните часови и утре преку денот ќе има врнежи од дожд, кои на повеќе места ќе бидат обилни (над 40 л/м2). Врнежите повремено ќе бидат поројни и проследени со грмежи, локално во форма на невреме со силен ветер.