Генералниот секретар на НАТО Јенс Столтенберг во неделата вечерта пристигна во Сараево, првата станица од регионалната мини турнеја низ земјите од Западен Балкан.
Придружуван од силни безбедносни мерки, по пристигнувањето во Сараево, Столтенберг се сретна со членовите на Претседателството на БиХ на работна вечера.
Неговите одвоени разговори со претседавачот на Советот на министри на БиХ, Борјана Кришта, министерот за одбрана Зукан Хелез и претставници на меѓународната заедница во БиХ, вклучително и високиот претставник Кристијан Шмит и командантите на седиштето на НАТО во Сараево и ЕУФОР, беа најавени за понеделник.
Босна и Херцеговина, заедно со Србија и Косово, е единствената земја во регионот надвор од НАТО.
Таа е членка на програмата Партнерство за мир и има одобрен Акционен план за членство во НАТО (МАП), што е цел дефинирана со актуелниот закон за одбрана на Босна и Херцеговина. Сепак, спроведувањето на реформите кои би го отвориле патот за полноправно членство во Алијансата со години упорно го блокираат политичарите од Република Српска на чело со Милорад Додик, кои во исто време се трудат да одржуваат што е можно поблиски врски со Русија.
По посетата на БиХ, Столтенберг заминува за Приштина.