Во живо Live емисија Гледај
Македонија

„Ги изгубивме децата, а сега и нашата болка им пречи, емпатијата ја нема“ – потресна исповед на татко од Кочани

„Ги изгубивме децата, а сега и нашата болка им пречи, емпатијата ја нема“ – потресна исповед на татко од Кочани

„Ние, семејствата што ги загубивме децата, сме најмногу изгорени од оваа трагедија, а денес сме оставени сами на себе.“ Со овие болни зборови Томче Стојков, татко на загинато дете во пожарот во дискотеката „Пулс“ во Кочани, го опиша чувството на осаменост и разочарување во емисијата „Ноќно студио“ на 4ТВ.

Стојков вели дека семејствата на жртвите очекувале поголема солидарност и поддршка, особено од оние кои ја преживеале трагедијата. Според него, дел од преживеаните и повредените не присуствуваат на маршевите за правда, судските рочишта и одбележувањата во спомен на загинатите.

Тој нагласи дека искрено посакува сите повредени целосно да закрепнат и да продолжат со животот, но истовремено чувствува дека болката на родителите сè повеќе се заборава.

„Ние, најмалку виновните, го плативме данокот, а со нас нема кој да сочувствува и да ја разбере нашата ситуација. Препуштени сме сами на себе“, истакна Стојков.

Особено го погодуваат, како што вели, коментарите дека родителите станале досадни со своите барања за правда и дека нивните маршеви негативно влијаеле врз работењето на одредени бизниси.

„Емпатијата ја нема, разбирањето го нема. Има коментари дека веќе сме досадни, дека некому му пречиме, па дури и дека поради нашите маршеви им паѓал бизнисот“, рече Стојков.

Според него, материјалните интереси сè почесто ги потиснуваат човечноста, солидарноста и сочувството.

„Сè е претворено во интерес, во материјално, во корист. Материјалното го презема човечкото“, порача Стојков во „Ноќно студио“ на 4ТВ.

Ноќно студио

Најнова епизода

Една година од почетокот на судењето за „Пулс“ – кои одговори ги чекаат родителите? | Ноќно студио

Сите епизоди →
Имате вест, приказна или проблем? Пишете ни